जनकपुर टुडे

२०८३ बैशाख २८, सोमबार ०७:२५

मधेश प्रदेश सरकारले सर्लाहीको लालबन्दी नगरपालिका–५ मेजरगन्ज झिरझिरेमा १५ लाख रुपियाँ खर्चे निर्माण गरेको किरियापुत्री भवन प्रयोगमा नआउँदै जीर्ण बनेको छ ।

झिरझिरेस्थित जरुवा किनारमा चार वर्षअघि निर्माण गरिएको उक्त भवन अहिले बेवारिसे अवस्थामा रहेको स्थानीयवासी बताउँछन् । गाउँलेहरूले यसलाई लागुऔषध सेवनकर्ताको अखडा बनेको भन्दै गुनासो गरेका छन् । मेजरगन्जकी गायत्री महत थापाले किरियापुत्री भवनसँगै रहेको ऐतिहासिक झिरझिरे जरुवा क्षेत्र वडा तथा नगरपालिकाको बेवास्तामा परेको बताए । उनका अनुसार किरियापुत्री भवन र जरुवा क्षेत्र अहिले फोहोर फाल्ने ‘डम्पिङ साइट’ मा परिणत भएका छन् ।

ऐतिहासिक जरुवामा जथाभावी फोहोर फ्याँकिँदा प्रदूषण बढेको र किरियापुत्री भवन लागुऔषध सेवनकर्ताको जमघटस्थल बनेको विषयमा नगरपालिका कार्यालयमा डेलिगेसनमार्फत ध्यानाकर्षण गराए पनि कुनै सुनुवाइ नभएको थापाले गुनासो गरे । उनले भने, ‘यस विषयमा टोल सुधार समितिमार्फत नगरपालिकामा गएर ध्यानाकर्षण गरायौँ तर आजसम्म कुनै सुनुवाइ भएको छैन ।’ स्थानीयका अनुसार भवन निर्माण भएदेखि अहिलेसम्म एकपटक पनि प्रयोगमा आएको छैन ।

परिवारको सदस्यको मृत्यु भएपछि १३ दिनको किरिया संस्कार गर्ने प्रयोजनका लागि निर्माण गरिएको भए पनि प्रयोगमै नआउँदै भवन जीर्ण बनेको हो । राज्यको बजेट फजुलमा खर्च भएको स्थानीयको गुनासो छ । भवनका झ्याल–ढोका तोडफोड गरिनुका साथै केही सामग्री चोरीसमेत भएको छ । लालबन्दी नगरपालिका–५ वडा कार्यालयका वडाध्यक्ष मीनप्रसाद ढुङ्गेल (रामु) ले आफू निर्वाचित हुनुअघि नै भवन निर्माण भएको र अहिले जीर्ण अवस्थामा देखिए पनि विस्तृत जानकारी नभएको बताए । उनले भवनलाई अन्य प्रयोजनमा ल्याउन सकिने अवस्था पनि नरहेको उल्लेख गरे ।

किरियापुत्री भवनसँगै रहेको झिरझिरे जरुवामा फोहोर फ्याँकिँदा त्यस पानीबाट सिँचाइ हुने लालबन्दी नगरपालिका–३ जब्दी क्षेत्रका किसान प्रभावित भएका छन् । बाह्रै महिना पानी रसाउने उक्त स्रोत अहिले फोहोरका कारण अवरुद्ध हुने अवस्थामा पुगेको किसानहरूको भनाइ छ । त्यसैगरी, बस्तीपुर जरुवापानी क्षेत्र पनि संरक्षण अभावमा फोहोर फाल्ने स्थान र लागुऔषध दुव्र्यसनीको थलो बनेको स्थानीयले बताएका छन् । जरुवापानी मुहान संरक्षण समितिका अध्यक्ष केशव पोखरेलले एकान्त क्षेत्र भएकाले संरक्षणमा कठिनाइ भइरहेको बताएका छन् ।